orakl des orakl vo delphi woa fria recht wichtig do a weis- sogung woar gauns sötn ah richtig des orakel vo delphi gibts heid nimmamehr doh unsre expertn gem ah ned mehr her ........................................................................................... ausredn waun ih meiner frau mid ausredn kumm, lossd mih mei frau goa ned ausredn! owa daun wüh's erst rechd ollas ausredn! des kau ih ihr leider nia ausredn! ........................................................................................... ma lernt nia aus ois vernünftiger mensch hob ih meistns glernd aus meine föhla - ois kreativer mensch moch ih oiweu wieder neiche föhla! ........................................................................................... prinzenbraut schau scheh mei liab jöh geh nah warum lochds warum wands warum schauts warum winkts? mia haum sorgn! ........................................................................................... frechheit "frechheit siegt" hod a oiweu gsogd! bis eam sei dummheit zwischn d'fiass gfoin is! ........................................................................................... wissn unser herrgod hod an föhler gmochd unser herrgod hod uns zvüh hirn gem so vüh hirn gem das ma glaum mir lösn olle probleme! unser herrgod hod an föhler gmochd unser herrgod hod uns vüh hirn gem so vüh das ma glaum mir wissen ois! unser herrgod hod an föhler gmochd unser herrgod hod uns zweng hirn gem so weng das ma ned seng wo unser wissn hifiad! ........................................................................................... rechd ih hob ned so ofd rechd, ois wiar ih gern mechd. des is ma ned rechd! mei frau hod vüh efta rechd, ois wiar ih's gern söwa mechd. des is ma goa ned rechd! doh waun ih's moi mechd und gib ihr glei rechd, daun is's des erst rechd, scho wieda ned rechd! ........................................................................................... zeid nehma maunche sochn muasda kaufm, maunche sochn griagsd gschengd, maunche sochn dansda leichn. owa d'zeit - de muasda nehma! ........................................................................................... joar a joar is nix nur a zoi a zoi im kalender! a tog a nocht a mondfasn a sunnwend des is wos des lebt ah ohne kalender! ........................................................................................... coca cola heid glaum fosd wirklih maunche kinder, das coca cola der erfinder vo weihnochd woa, vo santa claus! kausd song wos d'wüsd: so schaud's heid aus! ........................................................................................... a feiner mau so a fescher mau so elegant fosd scho vornehm. sehr scharmant, der schtottliche mau. der is so gepflegt! der muaß sih nochn glogeh nedamoi d'häntwoschn! ........................................................................................... die launische forelle die launische forelle die kann ich nicht beschreiben. sie ist mir viel zu schnelle, drum lass ich’s lieber bleiben. hat die forelle launen? so möchte ich euch fragen. es würd mich sehr erstaunen: sie liegt mir nie im magen! ich liebe die forelle, sie schmeckt stets zart und fein! frisch aus dem bächlein helle kann sie nicht launisch sein! ........................................................................................... waundern trekkingboots outdoorbag softshelljacket vitality-tank baselayer shirt zip-off trousers adventure-pant wind-breaker function-underwear eigentlih woit ih a waundagwaund kaufn eigentlih woit ih waundern geh owa schdodn waundern geh ih jetz ins wifi englisch lerna erst daun geh ih wieda ins sportgschäfd! ........................................................................................... woiknwoach wo d'sunn vom toi und d'sunn vom berg ea schensde zeid vabringan, auf woiknwoachn bergschauwiesn, hob ih mid dir in augnschmaus verspeisd. und mid an jedn augnblick samma leichter wurn bis uns da frische oimenwind ins blaue paradies vablosn hod! ........................................................................................... energieschpoan die EU hod fia d'umwöd a gauns a groß' herz! laumpn und kühschränk und noh mehr im haus miassn in zukunft energieschpoarend sei! find i geil! je mehr desto besser! nur guad, dass mei porsche, mid seine 400 ps, koa kühschraunk is! ........................................................................................... zschbäd! oiweu bessa woidt ma lem. oiweu mehr woidt ma hom. waun wer gsogd hod, "es reicht!" hods neamd ghead, hods neamd glaubd. wia daun aona vor da kamara zu de medien gsogd hod "es reicht!" woas da foische und vüh zschbäd! ........................................................................................... best of austria vor kurzn woar ih in da galarie, ih hob ma dochd, do geh ih hih! wauns as 'best of austria' nenna - de expertn und de kenna - daun muas des gauns wos bsundas sei; do geh ih hih, do geh ih nei! so bin ih hih und hob mih gschreckd: haum de des beste goa vaschteckd? bin ih do im richting haus? ih kenn mih wirklih nimma aus! ih griag die auskunfd, ih bi richtig wos do ausgschdöd is, is richtig! do hob ih augfaungt, z'überleng wos is denn do nur wirklih gscheng? daun is ma kumma wia a blitz: is leichd des gaunze nur a witz? haums leichd an witz gmochd, do mid linz mid da kuiturhauptschdod in da provinz? oda haums as goa foisch glesn di kuiturelln übawesn? und haum uns sochan gschickd, beflissn de's söba sicha ned vermissn. und haum sih dochd, des passd genau zu unsana nuineinerschau und so hängt, mit glaunz und gloria bei uns da - REST OF AUSTRIA. ........................................................................................... da fernsea wauns des fernsehn ned gab kennt ih mehr mid dir redn häd ih zeit fia an jedn wauns des fernsehn ned gab häd ih sötaner kreizweh dad ih efta schpazierngeh wauns des fernsehn ned gab gang ih fria ins bett wa a s'lesn gauns nett wauns des fernsehn ned gab kennt ih ohne schdress essn kennt ih d'kuchl vamessen wauns des fernsehn ned gab wauns des fernsehn ned gab sitzad ih mehr vorm computer ........................................................................................... winta da schnee is ned scheh, sondarn dreckig und fleckig! wiarin mog is a grod nur an dog: in da schtod! ........................................................................................... aufreng des regd mih auf waun sih maunche leid schoh aufreng bevors no wos zan aufreng gibt. de reng sih auf weu vielleicht wos kumma kennt wos zan aufreng wa! waun sih de leid ned aufreng dadn üwa wos wos vielleicht zan aufreng is, brauchad ih mih goa ned aufreng. owa so muas ih mih üwa de aufgregtn leid aufreng obwois goa nix gabad zan aufreng. des regd mih auf! ........................................................................................... nach einem zitat des slowenischen philosophen slavoj zizek: moderne zeiten bier ohne alkohol fleisch ohne fett kaffee ohne koffein gemüse ohne geschmack handel ohne ware banken ohne geld kurse ohne realität und hilflose politiker ........................................................................................... vorschpüh is des vorschpüh nur a schauschpüh und des hauptschpüh wird nur vorgschpühd wird des gaunze leicht zum drama mid an nochschpüh ........................................................................................... pubertät so gach is ois aunders; vo gestern auf heid! so gach is des kumma; gauns plötzlih woars do! so gach, das's ma weh duad, tiaf drin do, bein herz! so gach is mei kloane a tinedscher wuarn! und gach muas ih's lerna, is umgeh mit ihr! ........................................................................................... gästeehrungen oiweu di ehrungen, oiweu di scheiß ehrungen, des gehd mih so au so a schmafuh nur das'd fremdn wiedakumman so a schmoan nur lächalich so a theater so a gemeinheit haums mih do glot üwaseng! ........................................................................................... wana waun ih dih auschau, muas ih maunchmoi direkt wana, vor lauta glikk! waun ih dih gschbia, muas ih maunchmoi direkt lochn, vor lauta glikk! ........................................................................................... experte wia wird ma experte? frog ih mih. wos brauchd ma, ois experte? frog ih mih. häd ih's zeig dazua, fia an expertn? frog ih mih. kennt ih a oana sei, so a experte? frog ih mih. beschtimmt! sog ih ma, so oft, wia ih mih scho deischd hob! ........................................................................................... d'perfekte frau a kloans bissal föhd da, zu ana perfektn frau, nur a gauns kloans bissal! oba nur weus da föhd, des kloane bissal, bist grod fia mih d'perfekte frau! ........................................................................................... euro zersd de euromünzn, jetz de fuaßboi-euro! vo wo soid i do a euforie griang? des, wos i griagd hob, is ka euforie, sondern a EUROPHOBIE! ........................................................................................... s.u.v. massige monster mid maximaler motorkrofd miassn massiv fia maunche mochtlose matschos mid minimale maniern ois mikkrige moglpockung herhoidn MISTERIÖS! ........................................................................................... olympisch schport is unpolitsch so saung d'schportler und schtreckn bei da siegerehrung d'feist in d'höh! schport is unpolitsch so saung d'politiker und sitzn bei da eröffnung in da erstn reih! ........................................................................................... des is a soh ih hob dih gern ih mog dih so ih schdeh auf dih des is a so du bisd mei lem du mochsd mih froh bisd d'sunn fia mih des is a so ih wa recht oam wasd du ned do wa ohne glick des is a so du gibsd ma ois wos brauch ih no ih hob jo dih des is a so! ........................................................................................... asylrecht recht auf asyl oder extrem rechts? ........................................................................................... a nimma des a jeda jammert, das weihnochtn nimma des is, wos's amoi woa! a jeda duad mid, das weihnochtn nimma des is, wos's amoi woa! es is hoid a so, das weihnochtn nimma des is, wos's amoi woa! owa weihnochtn wor immer scho des wos ma söba draus mochd! ........................................................................................... g-punkd is da g-punkd der punkd wo sie sogd: geh los mih in ruah oder is da g-punkd der punkd wo er sogd: ih geh ins wirtshaus? ........................................................................................... gestern gestern hobihgsogd desmochihmoang! heid hobihkoazeid! gestern hobihdesschogwussd! moang warihfroh hädihsvorgestern gmochd, weugfrein wiadsmihmoang ahned! ........................................................................................... ungerechd fria hods amoi isrechd vom erstgeboranen gem. und ma hod a glaubd des ghead aso so is richti! owa jetz gibds des scho laung nimma is ungerechd isma draufkemma! isrechd vom dogeboranen des gibds oiweu no! ........................................................................................... dorf inan gloandörfü kaunsd fosdnixduan ohne dassned irgendwer midgriagd! irgendwen gibdsoiweu derdih beobochd, inan gloandörfü! desweng hoasdsjo: dwöd isadorf! ........................................................................................... schbüagü ih schau mih gauns gern in schbüagü! ohne einischaun geh ih aunan schbüagü nia vorbei! a waun ih ausn haus geh, schau ih no schnö in schbüagü! ih schau mih hoid gern in schbüagü! owa vorhoidn brauchdman koana, in schbüagü! ........................................................................................... glei oda goaned entweda glei oda goaned! des is mei dewise! entweda ih mochs glei oda goaned, weulih vergessn hob wos ih mochn woit! ........................................................................................... morgnmensch ih bin a morgnmensch! wauns fia mih koa morgn gab, mochad ih nie wos! weu des meiste, wos ih moch, moch ih morng! ........................................................................................... drahn wiarihs drah wiarihs wend findkoa end! wiahrihs wend wiahrihs drah esis schwah! drah oiswia wend oiswia griagkoa gschbia! lautawänd rundum mih drahmih rund umadum, drahmih ham! wia wendihs, wia drah ihs, dass guadis? ih drahsned ih wendsned ih gehjezd: grodaus! ........................................................................................... da mittlweg es is ned leichd: schdösd zweng aunschbrüch, rends lem aun dir vorbei! wüsd zvüh, rends da davo! ........................................................................................... koana woass koana woass wias duatn ausschaud koana woass wos duatn los is koana woass obs duatn scheh is . koana woass - owa olle - fosd olle - traman davo ned glei, owa doh in hümmü z'kemma! ........................................................................................... GELIEBTE was kann es schön’res geben als mit dir zu leben was kann denn schöner sein als deine lieb’ allein was kann denn besser sein als stets bei dir zu sein was könnt ich lieber tun als bei dir auszuruhn was könnt mehr mich betören als nur dir zu gehören was könnt mich mehr beglücken als dein entzücken NICHTS! ........................................................................................... ned so wia i wü wü ih’s rechts haum, daun wü’s noch links wü ih’s obm haum, zoagts owi! wü ih’s hiebei haum daun wü’s dauni wü ih’s zuwidruggn weichts ma aus! es is zan narrischwern mid so an bockign, vagrodanen, boathoar! ........................................................................................... bled ih bi oft so bled es is ned zan glaum d'kronenzeidung dua ih lesn obwoi ihs ned mog rtl-magazine dua ih schaun obwoi das mih aukozd mei partei dua ih wöhn obwoi das mih auliagd söchschpegg dua ih essn obwois ma ned guad duad schnapsln dua i gern obwoi ihs ned vadrog ih bi oft so bled es is ned zan glaum ........................................................................................... siebzehn billionen siebzehn billionen dreihundertvieradochzg milliardn zwoahundertneinafufzg millionan sekshundertochtaviazg tausnd oahundertzwoaradreißg gedichte san üban frühling, übas frische grea, und üba d'schene blia scho gschriem worn! ih schreib jetz koas mehr!! ........................................................................................... nju dihsein waunsd lerna wüsd wiasd hoiz in form bringa kausd in a schene form in a moderne form bringa kausd gibts jetz a schui a supa hochschui wosd oi des lernsd. hoassn duads de hohe schui: "nju dihsein juniwörsiti". sei duads: in sangd bötn! ........................................................................................... poetry slam vs stözhaumer häd a midgmochd, da fraunz häd a gsogd, lauta pflaunz häd a gsogd, lauta deppn oda midgmochd bein reppn? häd a midgmochd bein slem oda wara z'begwem häd a sih draud oda'n huad aufighaud? des san frong----de mih plong so a schas---------koana waß's is jo wurschd------i hob durschd bringz a bier-------her zu mir do häd a midgmochd, da fraunz gauns beschtimmt, ohne pflaunz häd a bier mid uns gschdemmd häd vasoffn sei hemd! daun häd a midgmochd, da fraunz häd midgmochd bein reppn häd uns zagd, mir san deppn gengan schtözhaumer fraunz ........................................................................................... gschwind ois gloans kind woidt i gschwind zu de schulabuam ghern. ois schulabua woidt i gauns gschwind mid da schui fertig sei. ois lehrbua woidt i recht gschwind mehr göd vadiena. ois junga hupfa woidt i gschwind a frau heiratn und votta wern. wia i laung gnua goabeit hob, woidt i gauns gschwind mei pension daglenga. jetzt braucht nix mehr gschwind daherkema! ........................................................................................... aussenseiter aussnseiter sonderling querkobf schpinner bunte vegl unter lauter schpozn etikettiert und ogschtömpüd neamd frogd warum ........................................................................................... jugndsündn süwester gfeierd mid liabe leid bier drunga zu an dirndl gsetsd wei drunga s'dirndl zuwadruggd sekt drunga s'dirndl obussld schnops drunga mehr woin watschn griagt! ........................................................................................... rückschau vor lauter zruckschaun zu süwester aufs oide joa vagiss i maunchmoi aufs virischaun aufs neiche joa. bis i's daun merk das des so is is's neiche joa scho wieder oid! ........................................................................................... s'neiche joa a guads neichs joa des oide is goa des neiche beginnt drum wünsch i eich gschwind a recht a guads joa besser goa wias oide woa! ........................................................................................... händi überoi händi im park händi im bod händi im woid händi auf kur händi am klo händi am weg händi überoi im weg ........................................................................................... freunocht i wünsch eich oin eicher weihnocht soi a freunocht und koa weinnocht ned sei! i wünsch eich oin das daun d'feiertog lauter freidndog koane leierdog ned san! und a zfriednheid und a friednszeid wünsch i eich firs neiche joa! ........................................................................................... kur kurhotel kuratel kursalon kurios kurzschluss kursiert kurerfolg kurz ........................................................................................... d'uhr ob d'uhr neich is oder oid, obs genau is oder ned, deier oder billig, protzig oder oafoch, obs schteht oder schpind, kriachd oder rennd: da zeid is des wurschd! ........................................................................................... schönheit bisd du no du? bi i no i? is er no er? is sie no sie? noch ana schönheits- chirurgie? ........................................................................................... rodwein da rode wein is so scheh im herbst! guad is a s'gaunze joa! ........................................................................................... waun ois wa waun ois wa wias so song des wa bled waun ois wuat wiari mecht des wa sche waun ois wa wiari wü des wa fad! ........................................................................................... wos i ois schreib i schreib üba d'liab weu i's gschpia tiaf in mir i schreib üba mi weu i was wia i bin i schreib üba d'leid weu i siag wias so san i schreib üba d'wöd weu i's gros woxn hea üba d'natur schreib i sötn - weu so scheh schreib i ned ........................................................................................... i bin wia i bin guad daß i bin wia i bin waun i ned wa wia i bin sondan wa wia a aundra daun wa i jo aundas daun wa i ned i ........................................................................................... gedaunkn gedaunkn san frei so songs üwaroi do di mein sicha ned de mein, de ghean mir! de loß i ned aus i duas heng und duas pfleng und irgend amoi hob i des wos i wü: an gauns großn gedaunkn ........................................................................................... meinungsfreiheit meinungsfreiheit! juhee! meinungsfreiheit? you? he? meinungsfreiheit!? you!? hee!! meinungsfreiheit??? you??? hehehehehehe........! ........................................................................................... schwoaz maunche seng ois rosa; maunche nur schwoaz; und aundane kennan nur schwoaz oda weiß! wos lem doh olle foabn schpühd ........................................................................................... geburtnzoin in oana gegnd wo d'geburtnzoin im september am hechstn san, wean schpäda amoi a di mehran ois jungfrau heiratn ........................................................................................... kauz liaba ois komischer kauz augseng wean ois wia ois dodnvogl vaschrian!